Euphorbia Onafhanklike Christelike Skool

Euphorbia Christelike Onafhanklike Skool is gesetel in die dorp Naboomspruit, ongeveer 150km van Pretoria af en het sy ontstaan in 2004 gehad nadat die behoefte by ‘n groep ouers ontstaan het om ‘n alternatief vir staatsonderrig daar te stel. Ons het in 2004 begin met ongeveer 25 kinders in ons voorskoolse afdeling en nege kinders in Graad 1 en 2 gekombineerd. Ons het tans 95 leerders in Graad 1 – 7 en 40 kinders in ons voorskoolse afdeling.

Ons het in 2007 ons nuwe skoolgeboue betrek nadat ons vir drie jaar drie woonstelle gehuur het. Die nuwe skoolgeboue word deur ‘n ouer van die skool gefinansier. Die eerste twee fases is reeds voltooi en bestaan uit: 11 klaskamers, badkamers, ‘n administratiewe blok en ‘n saal.

Euphorbia Christelike Onafhanklike Skool is ‘n Afrikaanse Christen skool en kleuterontwikkelingsentrum waarbinne die Afrikanerkultuur uitgeleef word. Ons wil graag ons kinders toerus om die nuwe Suid-Afrika tegemoet te gaan. Leerders word aangemoedig om aan alle aktiwiteite deel te neem, in ‘n poging om hulle tot hulle volle potensiaal te laat ontwikkel. Hoë akademiese standaarde is ononderhandelbaar.

Die skool is ‘n Artikel 21 – Maatskappy, ouergedrewe skool wat geen subsidie van die staat ontvang nie. Die ouers van die skool neem die volle verantwoordelikheid vir alle finansiële verpligtinge. In ‘n poging om ons skoolfonds so laag as moontlik te hou, steun ons baie hard op fondsinsamelings reg deur die jaar, wat dan die skoolfonds subsidieer. Die fondsinsamelings word dus slegs vir die bedryfskoste van die skool aangewend.

Woord van die Skoolhoof

As opvoeders verbonde aan hierdie skool, streef ons daarna om u kind, met ú samewerking én met God aan die stuur: standvastigheid en sekuriteit te bied in ‘n verwarde veranderende wêreld, om aan hom feitelike kennis, maar ook ‘n besondere waardestelsel oor te dra, die kind te lei tot ondekking van homself en die omgewing waarbinne hy funksioneer en om hom aan die hand te neem en te begelei om sy volle potensiaal te ontwikkel.

Ons as opvoeders aanvaar met trots hierdie uitdaging om u kinders op hierdie pad te begelei!

Minnie Jacobs

Boodskap van die Voorsitter van die Direksie van Euphorbia Christelike Onafhanklike Skool

Die winde van verandering het in ons, om ons en deur ons gewaai, nie noodwendig sonder rede nie.

Ons geslag staan weer by die kruispad van oorlewing, besluitneming, opoffering en verantwoordelikheid teenoor ons Hemelse Vader, ons kinders, ons Afrikaanse taal en alles om Afrikaner te wees.

Gaan ons die Geskiedenis, net skryf met verlange en verwyt, óf gaan ons kan skryf van dankbaarheid vir die genade van bo en die klein deel wat ons vir ons nageslag gedoen het.

“Die Skool”, “Ons Skool” is 'n groot voorreg, nie 'n reg nie. Mag ons as volk ewig dankbaar wees vir dié wat in die verlede bereid was om die sprong na vryheid en hoop ter wille van ander te maak.

Dié geleentheid wat ons te beurt geval het, moet ons koester as een van die belangrikste ligpunte van môre. Ons moet poog om opregtheid, eerbied, samehorigheid, respek en trots tuis te bring by ons kinders.

Ons kinders moet toegerus wees vir more - moet verstaan, respekteer en aanvaar dat daar ander volkere en tale is en dat ons hul ook hul plek gun.

Mag ons as personeel, ouers, leerlinge en vriende van “ons skool” leer om by die nietighede en negatiewe verby te kyk en te fokus op dit wat positief is, te dryf dit wat ons s'n is om ons drome en ideale te verwesenlik. Dit sal meebring dat ons as volk moet saamstaan, dat elkeen sy bydae in watter vorm ook al sal maak, vertroue in onsself sal hê en die heel belangrikste - ons totale vertroue in die genade van God te plaas.

Mag U ons lei - “ In U Lig! “

Stanford Cawood

Die Skoolwapen

• Die middelpunt van die wapen is die Euphorbia boom (Latyns vir Naboom) wat simbolies is vir groei en standvastigheid.
• Twee skilde vorm die basis van die wapen:
• Die kleiner skild dui op die koestering van ons kinders.
• Die groter skild dui daarop dat ons kinders toegerus is vir die toekoms.
• Die raam van die kleiner skild is afwisselend wit en maroen.
• Die wit simboliseer reinheid en die maroen die aardse, wat sinspeel op die wisselwerking van emosies en die vermoë om tussen goed en kwaad te onderskei.
• Die blou agtergrond spreek van onbeperkte ruimte vir groei en is ‘n koningskleur vir Koningskinders.
• Die groen agtergrond dui op lewe, groei en oorvloed.
• Die blou en groen getuig van kalmte en rustigheid.
• Die geel strale stel die opkomende son voor vir ‘n opkomende geslag -
• ‘n nuwe begin!
• Die leuse is vanselfsprekend:
• In GOD se Lig, sien ons die Lig!

Ontwerp deur: Inga Cawood, 2004

Kontak Euphorbia Skool by 014 7433137